Día da Poliomielite: as campañas de vacinación evitaron a minusvalidez a 10 millóns de nenos

Como recordamos na campaña contra a mortalidade infantil Agora non podemos parar, algo tan sinxelo como unha vacina pode marcar unha gran diferenza nas vidas de miles de nenos.

Ao redor de 1.000 nenos ao día foron protexidos contra a polio grazas ao esforzo mundial ao longo de 26 anos para erradicar esta enfermidade.

A través da vacinación, esta iniciativa mundial evitou a minusvalidez de millóns de nenos de todo o mundo que antes non recibían a vacina.

O número anual de casos de polio reduciuse de 350.000 en 1988 a 416 en 2013, e a 243 no que vai deste 2014, un descenso extraordinario de máis dun 99%. Todos os países onde a polio estaba firmemente atrincheirada, agás tres deles -Afganistán, Nixeria e Paquistán- eliminaron o virus dentro das súas fronteiras. Tamén se contiveron múltiples brotes nos últimos 26 anos.

En Nixeria rexistráronse só 6 casos este ano, fronte a 49 en 2013. Afganistán reduciu a transmisión a niveis moi baixos, e a maioría dos casos están vinculados a Paquistán. Con 206 casos rexistrados xa este ano, Paquistán é agora o maior reservorio de polio do mundo.

Aínda que a polio é endémica en só tres países, segue representando un risco para todos os nenos do mundo, especialmente naqueles países que non consideran a inmunización sistemática como unha prioridade, como Sudán do Sur, a República Centroafricana e Ucraína. Os brotes de Sirya, Iraq, Camerún, Guinea Ecuatorial e Somalia están vinculados a Paquistán e Nixeria.

Grazas aos seus socios, doadores e aliados, UNICEF adquire todos os anos 1.700 millóns de dose da vacina oral contra a polio para chegar a 500 millóns de nenos. O traballo de mobilización social de UNICEF asegura que as familias acepten a vacina cando a reciben. Os intensos esforzos na última década levaron a que a aceptación da vacina contra a polio chegue aos seus niveis históricos máis altos nos países onde a poliomielite é endémica.

Agora NOn podemos parar de salvar vidas