Novak Djokovic, novo Embaixador de Boa Vontade de UNICEF

En UNICEF temos un novo Embaixador de Boa Vontade. O tenista número un do mundo, Novak Djokovic, incorporouse á lista de personalidades que prestan a súa voz para defender os dereitos dos nenos dende a nosa organización.

Antes deste nomeamento, Djokovic xa contaba cunha traxectoria de peso no traballo coa infancia máis vulnerable, como demostra a súa etapa de Embaixador de UNICEF Serbia ou o labor da fundación que leva o seu nome.

"Novak Djokovic é un auténtico defensor dos nenos en todo o mundo", dixo Yoka Brandt, directora adxunta de UNICEF no acto de presentación do novo Embaixador de Boa Vontade. Demostrou que unha voz potente, xunto a accións potentes, poden supoñer unhagran diferenza para os nenos, especialmente cando son moi pequenos, engadiu.

Dende que o tenista comezou a colaborar con UNICEF Serbia en 2011, non deixou de impulsar melloras na vida dos nenos, especialmente a daqueles máis vulnerables. Ademais, Djokovic mostrou sempre un grande interese pola educación dos nenos máis pequenos.

novak djokovic: "os primeiros anos de vida son cruciais"

"Os primeiros anos de vida son cruciais. Cando os nenos reciben a educación e os coidados adecuados na súa primeira etapa, teñen máis probabilidades de sobrevivir, de crecer de xeito san, de ter menos enfermidades, de desenvolver capacidades creativas, comunicativas, emocionais e sociais, así como de converterse en cidadáns de éxito na nosa sociedade," recordou Djokovic no evento do seu nomeamento.

Novak xa conseguiu mellorar a vida de moitos nenos. Como Embaixador de UNICEF Serbia, visitou moitas gardarías e escolas infantís para comprobar a importancia de impulsar aaprendizaxe na primeira infancia. Grazas ao seu apoio e o da súa fundación, os nenos máis vulnerables de Serbia gozan dunha educación preescolar máis inclusiva e flexible.

A Fundación Novak Djokovic tamén financiou un innovador servizo de UNICEF Serbia cuxo obxectivo era conectar con familias de zonas urbanas. Tivo tanto éxito que agora está integrado no sistema de protección infantil serbio.

O compromiso do tenista coa infancia máis vulnerable impulsounos a propoñerlle este nomeamento. Djokovic únese así á lista de entregados Embaixadores de Boa Vontade que forman ou formaron parte de UNICEF, como Danny Kaye, Audrey Hepburn, David Beckham, Harry Belafonte, Orlando Bloom, Katy Perry, Sir Roger Moore, Shakira, Maxim Vengerov ouSerena Williams,entre outros.