Somalia: aulas masificadas e sen alimentos para os nenos

A pesar das melloras producidas na zona centro e sur de Somalia, unha enquisa realizada recentemente revela que centos de miles de nenos afectados pola crise humanitaria non reciben asistencia alimentaria nas escolas.
 

Aínda que os aliados de UNICEF intensificaron os seus esforzos en materia de educación para proporcionar servizos esenciais a través das escolas a máis de400.000 nenos, dos que o 45% son nenas, en máis de 1.900 escolas, a enquisa indica que case o 16% das escolas do centro e sur de Somalia non puideron iniciar o novo curso académico debido aos desprazamentos, a inseguridade e a falta de fondos.

"As ameazas como a desnutrición extrema e as enfermidades, así como os conflitos, poden impedir que centos de miles de nenos vexan realizados os seus dereitos a asistir á escola e recibir unha educación de calidade", dixo Sikander Khan, Representante de UNICEF en Somalia.

"Aínda que estamos agradecidos polo enorme apoio que recibimos até o momento, necesítanse máis fondos para proporcionar ás escolas servizos esenciais que atraian aos nenos á escola e así poder mantelos nas aulas", engade.

Prioridades: repartición de comida e transferencias de diñeiro

O persoal das escolas enquisadas recoñece que entre as súas prioridades está a repartición de comida nas escolas, as transferencias de diñeiro, e a distribución de racións de comida para levar a casa. Con todo, a avaliación revela que só o 13% das escolas proporciona algún tipo de asistencia alimentaria.

Outras prioridades son a construción e rehabilitación de aulas, así como a posta en marcha dun programa de incentivos para apoiar aos docentes debido a que o persoal das escolas recibe salarios moi baixos.

O informe subliña que polo menos93 escolas e espazos educativos están a utilizarse como refuxios por persoas desprazadas e por tanto non están dispoñibles para impartir clases, o que deteriora aínda máis o debilitado sistema educativo. En Somalia, 1,8 millóns de nenos de entre 5 e 17 anos non poden ir á escola, unha situación que xa se producía mesmo antes do inicio da crise actual.

Nas zonas afectadas pola fame  onde se atopan os desprazados ou onde hai unha maior presenza de aliados no campo educativo, rexistrouse un aumento no número de matriculacións nos últimos meses.

Non hai xabón no 97% das escolas

• Nas escolas que lograron volver abrir, a seca e os desprazamentos impediron que aproximadamente o 13% dos mestres regresen aos seus postos de traballo.
• A maioría das escolas avaliadas non ten acceso a servizos de saúde e hixiene, o que fai que os nenos sexan vulnerables a brotes de diarrea e cólera. Non hai xabón no 97% das escolas, e só o 14% das escolas ofrecen información sobre hixiene.
• Na maioría das escolas, a auga potable atópase a uns 100 metros, con todo, hai nenos que teñen que camiñar máis de 1 km para acceder a unha fonte de auga.

Na actualidade, os aliados en educación puxeron en marcha unha ampla gama de programas no centro e sur de Somalia, para a subministración de libros de texto, materiais escolares, apoio aos mestres, a rehabilitación e construción de escolas, así como a formación e capacitación do persoal docente.