Tifón en Filipinas: Pau Gasol e Ana Duato recordan a catástrofe un mes despois
O 8 de novembro cúmprese un mes do tifón Haiyan que arrasou Filipinas, e a cifra de nenos afectados pola catástrofe xa supera os 6 millóns.
Os embaixadores de UNICEF Comité Español Ana Duato e Pau Gasol, e os nenos Ricardo Lezón e Rocío Navarro gravaron o anuncio da campaña por Filipinas que puxo en marcha o comité de UNICEF en España para conseguir fondos para o traballo da organización nesta emerxencia.
No vídeo, Pau Gasol, Ana Duato, Rocío Navarro e Ricardo Lezón recordan que millóns de nenos perderon todo a causa do tifón, do que o 8 de decembro se cumpre un mes, e piden a colaboración de todos para poder responder ás enormes necesidades dos afectados.
Este anuncio forma parte da campaña por Filipinas, á que xa se uniron outros embaixadores e colaboradores de UNICEF en todo o mundo a través de distintas iniciativas. En España, 50 personaxes públicos que colaboran coa organización difundiron o chamamento por Filipinas a través de medios de comunicación e de redes sociais. Centros educativos, medios de comunicación, empresas, fundacións e outras entidades do sector privado apoian esta campaña.
Grazas a estes apoios, a miles de persoas que responderon ao chamamento de UNICEF enviando SMS ou doando a través doutras canles, a empresas e fundacións que realizaron doazóns e a centros educativos que participan na campaña, UNICEF Comité Español achegou 2,4 millóns de euros ao traballo da organización en Filipinas, chegando a miles de familias e nenos con subministracións e servizos básicos para a súa supervivencia e a súa recuperación.
Pero aínda hai moito traballo por diante. O alcance do desastre que destruíu fogares, infraestruturas e medios de vida, deixou millóns de familias dependendo da axuda humanitaria. Conseguir que todos eles teñan as súas necesidades cubertas ata que poidan volver ter casa, traballo e os servizos básicos restablecidos, supón un grande esforzo a medio prazo e os recursos necesarios.
Axuda a Filipinas: o traballo de UNICEF
O traballo de UNICEF, xunto co goberno de Filipinas e outras organizacións humanitarias, logrou que máis de 428.000 persoas teñan acceso a auga potable en diferentes cidades, incluíndo 200.000 en Tacloban. A falta de auga potable e dun saneamento axeitado pode causar brotes de enfermidades potencialmente mortais. Por iso, á parte do acceso a auga potable, UNICEF e a OMS emprenderon unha campaña de vacinación contra a polio e o sarampelo para máis de 30.000 nenos.
En situacións como a que se está a vivir en Filipinas é fundamental protexer os nenos. UNICEF e os seus colaboradores fano localizando aqueles que están sós e inscribíndoos nun rexistro que serve para intentar encontrar os seus familiares e lograr que volvan estar xuntos. Ademais, UNICEF abre Espazos Amigos da Infancia, lugares seguros onde os nenos participan en actividades educativas, deportivas e de ocio que lles axudan a recobrar certa sensación de normalidade. Os nenos reciben tamén apoio psicosocial para superar o trauma que sufriron.
Dende que se produciu o tifón hai un mes, UNICEF distribuíu miles de artigos como lonas, cubos, pastillas potabilizadoras de auga, suplementos de micronutrientes e kits de hixiene, recreativos e educativos.
Pero aínda queda moito por facer. Millóns de familias perderon os seus fogares e os seus medios de vida. Un 80% dos nenos de Tacloban non puido volver a clase, e 1,35 millóns de nenos están en risco de sufrir desnutrición. Para poder seguir abordando este traballo en Filipinas durante os próximos meses, UNICEF fixo un chamamento de 61,5 millóns de dólares (uns 45,5 millóns de euros).