200 millóns de mulleres e nenas son vítimas da mutilación xenital feminina
Día Internacional de Tolerancia Cero coa Mutilación Xenital FemininaPolo menos 200 millóns de nenas e mulleres que viven en 30 países sufriron a mutilación xenital feminina, segundo un informe estatístico publicado a véspera do Día Internacional de Tolerancia Cero coa Mutilación Xenital Feminina (6 de febreiro).
O informe Female Genital
Mutilation/Cutting: A Global Concern (A mutilación xenital
feminina: unha preocupación mundial) destaca que a metade das
nenas e mulleres que sufriron esta práctica viven en tres países
?Exipto, Etiopía e Indonesia; con todo toma como referencia estudos
de menor dimensión e datos anecdóticos que proban que a ablación é
un problema mundial de dereitos humanos que afecta as nenas e as
mulleres en todas as rexións do mundo.
A mutilación xenital feminina
refírese a varios procedementos distintos. Pero independentemente
da forma en que se practique, supón unha violación dos dereitos da
infancia.
"A mutilación xenital feminina
difire entre rexións e culturas, e hai algunhas formas que implican
riscos potencialmente mortais para a saúde. En todos os casos,
viola os dereitos das nenas e as mulleres. Todos debemos
incrementar esforzos -os gobernos, os profesionais da saúde, os
líderes comunitarios, os pais e nais, e as familias- para eliminar
esta práctica", dixo a directora executiva adxunta de UNICEF, Geeta
Rao Gupta.
Segundo os datos, do total de
mulleres que sufriron a ablación 44 millóns son nenas menores de 14
anos. A maior incidencia desta práctica entre as nenas desta idade
prodúcese en Gambia, cun 56%, en Mauritania cun 54%, e en
Indonesia, onde ao redor da metade das nenas menores de 11 anos
foron sometidas á práctica. Os países con maior prevalencia da
mutilación xenital entre nenas e mulleres de 15 a 49 anos son
Somalia, cun 98%, Guinea, cun 97%, e Djibouti, cun 93%.
En moitos países a maioría das
nenas sufriron a ablación antes de chegar aos seus quintos
aniversarios.
Segundo o informe sufriron esta
práctica 70 millóns máis de nenas e mulleres que en 2014. Isto
débese ao aumento de poboación nalgúns países e aos datos
representativos a nivel nacional recompilados polo goberno de
Indonesia. A medida que se dispón de máis datos sobre o alcance da
mutilación xenital feminina aumenta a estimación do número total de
nenas e mulleres que a sufriron. Desde 2016, 30 países dispoñen de
datos representativos a nivel nacional sobre a mutilación.
"Determinar a magnitude da
mutilación xenital feminina é esencial para eliminar a práctica.
Cando os gobernos recompilan e publican as estatísticas nacionais
atópanse nunha mellor posición para entender o alcance do problema
e acelerar os esforzos para protexer os dereitos de millóns de
nenas e mulleres", dixo Rao Gupta.
O traballo para eliminar esta
práctica é cada vez maior. As taxas de prevalencia da mutilación
xenital feminina diminuíron entre as nenas de 15 a 19 anos, como
reflicte o descenso dun 41% en Liberia, dun 31% en Burkina Faso,
dun 30% en Kenya e dun 27% en Exipto nos últimos 30 anos.
Desde 2008 máis de 15.000
comunidades e distritos en 20 países declararon publicamente o
abandono da mutilación xenital feminina, incluíndo máis de 2.000
comunidades o ano pasado. Cinco países aprobaron leis que penalizan
a práctica.
Os datos tamén indican a
desaprobación xeneralizada da práctica, xa que a maioría das
persoas dos países onde existen datos sobre a mutilación xenital
feminina pensan que se debe eliminar. Isto inclúe case dúas
terceiras partes dos nenos e os homes.
Pero estes progresos non son
suficientes dado o crecemento da poboación: se as tendencias
actuais continúan, o número de nenas e mulleres sometidas á
mutilación xenital feminina aumentará considerablemente nos
próximos 15 anos.
UNICEF, xunto co Fondo de
Poboación das Nacións Unidas (UNFPA polas súas siglas en inglés),
codirige o maior programa mundial para a eliminación da mutilación
xenital feminina. Colabora en todos os niveis cos gobernos, as
comunidades, os líderes relixiosos e outros aliados para poñer fin
á práctica.
Coa inclusión dunha meta sobre a
eliminación da mutilación xenital feminina nos novos Obxectivos de
Desenvolvemento Sustentable para 2030, o compromiso da comunidade
internacional para poñer fin á ablación é máis sólido que
nunca.
Para acceder a fotografías:
ftp://video.unicef.es/MGF/fotos
Usuario: Refcom
Contrasinal: uce442087
Para descargar o informe (en inglés):La mutilación genital femenina: una preocupación mundial
Nota para os editores
Female Genital Mutilation/Cutting: A Global Concern baséase en datos de máis de 90 enquisas representativas a nivel nacional, e por tanto é a compilación máis actualizada de estatísticas sobre a mutilación xenital feminina realizada nunca.