Case 385 millóns de nenos viven en situación de pobreza extrema, segundo un estudo conxunto de UNICEF e o Grupo do Banco Mundial
Os nenos teñen máis do dobre de probabilidades que os adultos de vivir en situación de pobreza extrema, segundo a nova análise publicada polo Grupo do Banco Mundial e UNICEF.Ending Extreme Poverty: A Focus on Children ["Erradicar a pobreza extrema: a situación dos nenos"] revela que, en 2013, un 19,5% dos nenos dos países en desenvolvemento vivían en fogares que saían adiante con 1,90 dólares ao día ou mesmo menos por persoa, en comparación a só un 9,2% dos adultos. En todo o mundo, case 385 millóns de nenos vivían en situación de pobreza extrema no mesmo ano.
Os nenos ven afectados de maneira
desproporcionada, xa que representan aproximadamente unha terceira
parte da poboación obxecto de estudo pero, ao mesmo tempo, a metade
de quen están en situación de pobreza extrema. Os nenos máis
pequenos corren máis perigo: máis dunha quinta parte dos menores de
cinco anos dos países en desenvolvemento vive en fogares
extremadamente pobres.
"Os nenos non só teñen máis
probabilidades de vivir en situación de pobreza extrema, senón que
ademais son os máis prexudicados polos seus efectos. Son os peor
parados dos peor parados; e a situación dos máis pequenos é aínda
peor, porque as privacións das que son vítimas afectan o
desenvolvemento dos seus corpos e as súas mentes", explica Anthony
Lake, Director Executivo de UNICEF. ?Resulta chocante que a metade
de todos os nenos do África Subsahariana e un de cada cinco nenos
dos países en desenvolvemento estean a crecer en situación de
pobreza extrema. Isto non só limita os seus futuros, senón que
arrastra tamén ás sociedades ás que pertencen.
Esta nova análise aparece xusto
despois da publicación do novo estudo estrela do Grupo do Banco
Mundial, Poverty and Shared Prosperity 2016: Taking on Inequality
[Pobreza e prosperidade compartidas 2016: abordar a desigualdade]
que mostra que 767 millóns de persoas de todo o mundo vivían con
menos de 1,90 dólares ao día en 2013, e a metade deles tiñan menos
de 18 anos.
"O gran número de nenos en
situación de pobreza extrema pon de manifesto a necesidade real de
investir especificamente nos primeiros anos: en servizos como
atención prenatal para nais embarazadas, programas para o
desenvolvemento na primeira infancia, escolarización de calidade,
auga limpa, saneamento adecuado e atención médica universal",
sostiña Ana Revenga, directora superior do Departamento de
Prácticas Mundiais de Redución da Pobreza e Promoción da Equidade
do Grupo Banco Mundial. "A única forma de romper o ciclo de pobreza
intergeneracional que está tan estendido na actualidade é mellorar
eses servizos e garantir que os nenos de hoxe poidan ter acceso a
oportunidades laborais de calidade cando lles chegue o
momento".
A estimación global da pobreza
infantil extrema está baseada en datos de 89 países, o que
representa o 83% da poboación do mundo en desenvolvemento.
África Subsahariana rexistra as
maiores taxas de nenos que viven en situación de pobreza extrema,
algo inferiores ao 50%, así como a porcentaxe máis alta dos nenos
máis pobres de todo o mundo, superior ao 50%. Asia Meridional conta
coa segunda porcentaxe máis alto, preto dun 36%, e só na India vive
máis do 30% dos nenos en situación de pobreza extrema. Polo menos
catro de cada cinco nenos que vive en situación de pobreza extrema
atópanse en zonas rurais.
Así mesmo, o informe revela que,
mesmo en limiares máis altos, a pobreza segue afectando os nenos
desproporcionadamente. Ao redor dun 45% deles vive en fogares que
subsisten con menos de 3,10 dólares ao día por persoa, en
comparación a case un 27% de adultos.
UNICEF e o Grupo do Banco Mundial
están a apelar aos gobernos para que:
Avalíen de forma rutineira a
pobreza infantil a nivel nacional e subnacional e céntrense nos
nenos e en plans para a redución da pobreza nacional como parte dos
esforzos destinados a erradicar a pobreza extrema antes de
2030.
Fortalezan os sistemas de
protección social adaptados aos nenos, tales como os programas de
transferencia de efectivo que axudan directamente ás familias
pobres a financiar os alimentos, a atención médica, a educación e
outros servizos que protexen aos nenos do impacto da pobreza e
aumentan as súas posibilidades de romper o ciclo nas súas propias
vidas.
Dean prioridade aos investimentos
en educación, saúde, auga limpa, saneamento e infraestruturas que
beneficien aos nenos máis pobres, así como aquelas que axuden a
previr unha recaída na pobreza despois de contratempos como secas,
enfermidades ou inestabilidades económicas.
Configuren as decisións políticas
de forma que o crecemento económico beneficie aos nenos máis
pobres.
UNICEF e o Grupo do Banco Mundial
están a traballar cos seus aliados para interromper os ciclos de
pobreza e promover o desenvolvemento temperán da infancia, grazas a
un amplo abanico de programas que inclúen transferencias de
efectivo, nutrición, atención médica e educación.
#######
Acerca de UNICEF
UNICEF promove os dereitos e o
benestar de todos os nenos e nenas en todo o que facemos. Xunto aos
nosos aliados, traballamos en 190 países e territorios para
transformar este compromiso en accións prácticas, centrando
especialmente os nosos esforzos en chegar aos nenos máis
vulnerables e excluídos para o beneficio de todos os nenos, en
todas partes.
Acerca do Grupo do Banco Mundial
O Banco Mundial é unha fonte fundamental de asistencia financeira e técnica para os países en desenvolvemento de todo o mundo, pois traballamos xuntos para erradicar a pobreza extrema antes de 2030 e promover a prosperidade compartida en cada país. Somos unha das maiores fontes de financiamento externo para a educación, a loita contra o VIH/SIDA e os proxectos sobre biodiversidade, subministracións de auga e saneamento. Xunto aos nosos 189 países membros, traballamos para afrontar as dificultades máis apremiantes do desenvolvemento de todo o mundo. Para obter máis información sobre o Grupo do Banco Mundial, diríxase a www.worldbank.org. Síganos en Twitter and Facebook