Case 750 millóns de persoas aínda carecen de auga potable axeitada

A pesar dos extraordinarios avances en materia de auga potable a nivel mundial, as persoas máis vulnerables non se están a beneficiar. En toda España, máis de 100.000 nenos participan en carreiras da auga a favor da infancia en Níxer

Con motivo do Día Mundial da Auga, UNICEF manifestou que o acceso a auga potable foi un dos maiores logros dos Obxectivos de Desenvolvemento do Milenio (ODM), pero que obter este servizo esencial segue representando un serio problema para 748 millóns de persoas en todo o mundo.

"Dende 1990, a historia do acceso a auga potable estivo marcada por enormes avances, malia circunstancias adversas en extremo difíciles", dixo Sanjay Wijesekera, xefe dos programas mundiais de auga, saneamento e hixiene de UNICEF. "Pero queda moito por facer. A auga é a esencia da vida; non obstante, 750 millóns de persoas, sobre todo, aqueles en situación de pobreza e marxinalidade, seguen privados deste dereito humano fundamental".

Ao redor de 2,3 millóns de persoas accederon a fontes de auga potable melloradas dende 1990. Como resultado, a meta do ODM de reducir á metade a porcentaxe da poboación mundial sen acceso a auga potable alcanzouse 5 anos antes de vencer o prazo, fixado para 2015. Actualmente só hai tres países -Mozambique, Papúa Nova Guinea e República Democrática do Congo- onde máis da metade da poboación adoece de falta de auga potable mellorada.

Pero, a pesar destes progresos, segue habendo disparidades significativas. Dos 748 millóns de persoas en todo o mundo que aínda non se están a beneficiar, o 90% viven en zonas rurais e están a quedar marxinadas do progreso dos seus países.

A falta de auga apta para o consumo pode ter consecuencias tráxicas para os nenos. En media, preto de 1.000 nenos morren todos os días a causa de enfermidades diarreicas asociadas con auga potable contaminada, saneamento deficiente ou malas prácticas de hixiene.

No caso das mulleres e as nenas, recoller auga reduce o tempo que poden dedicar ao coidado das súas familias e ao estudo. En zonas inseguras, saír a recoller auga leva consigo o risco de ser vítimas de violencia e ataques. UNICEF calcula que, soamente en África, a xente camiña 40.000 millóns de horas todos os anos para abastecerse de auga.

O acceso a auga potable en África subsahariana, a rexión coa cobertura máis baixa en 1990, incrementouse a razón de 50.000 persoas diarias dende o ano 2000. Non obstante, a esta rexión corresponden máis de dous de cada cinco persoas que carecen de acceso a nivel mundial; é dicir, 325 millóns. A maioría dos países da rexión non están en camiño de conseguir a meta do ODM.

Outra rexión que preocupa é Oceanía, onde apenas se rexistraron progresos dende 1990. Un alto número de persoas non dispón de auga potable en China (112 millóns) e na India (92 millóns).

En colaboración con gobernos e aliados, UNICEF está a impulsar o desenvolvemento de métodos innovadorese económicos que permitan avanzar neste ámbito.

- En Bangla Desh, UNICEF utilizou un método interesante e novidoso para captar auga de chuvia e posteriormente bombeala a acuíferos pouco profundos, ofrecendo seguridade na subministración de auga a aproximadamente 1 millón de persoas cuxas augas subterráneas se salinizado.

- En República Democrática do Congo, grazas ao modelo de "aldeas saudables", máis de medio millón de persoas obtiveron acceso en 2014 a fontes de auga potable e servizos de saneamento mellorados nas súas comunidades, e 229 escolas foron dotadas de instalacións de auga, saneamento e hixiene.

#díadelagua, é o hashtag co que o Comité Español de UNICEF poñerá de relevo a dura situación dos que seguen carecendo de auga potable.

Gotas para Níxer

UNICEF Comité Español espera que este curso participen preto de 100.000 nenos e nenas pola infancia de Níxer a través das Carreiras da Auga. Estas carreiras forman parte da campaña Gotas para Níxer, no marco do programa Enrédate con UNICEF, e que ten como propósito dotar trinta escolas de fontes de auga potable.

Estas actividades deportivas contribúen a apoiar o traballo de UNICEF en Níxer para mellorar o acceso da poboación a auga, hixiene e saneamento, contribuíndo así a que cada vez máis nenos nixerianos gocen do seu dereito á saúde, a educación e a protección. Níxer é un dos países onde a falta dun acceso universal e seguro a fontes de auga potable e servizos de saneamento e hixiene limita os dereitos de máis nenos e nenas. En Níxer, o 50% da poboación permanece sen auga potable e tan só un 4% dos que viven en zonas rurais ten acceso a saneamento. Máis información en:http://www.enredate.org/gotas