Case unha de cada catro adolescentes sofre actos de violencia

Alarmantes niveis de aceptación da violencia contra as nenas

En preparación do Día Internacional da Nena, UNICEF presentou unha nova recompilación de datos que revela a magnitude da violencia contra as nenas e as alarmantes actitudes que perpetúan este tipo de abuso.

A recompilación incorpora unha selección de datos mundiais publicados ao longo do ano que detallan o impacto tan real que a violencia ten sobre as adolescentes, sobre o seu futuro e sobre o futuro das súas comunidades e países. As principais estatísticas indican o seguinte:

• Case unha cuarta parte das nenas de 15 a 19 anos de todo o mundo (aproximadamente 70 millóns) indicaron que foron vítimas dalgunha forma de violencia física dende os 15 anos.
• Cada 10 minutos unha adolescente morre como resultado da violencia.
• Ao redor de 120 millóns de nenas menores de 20 anos en todo o mundo (preto de 1 de cada 10) foron vítimas de relacións sexuais forzadas ou outro tipo de actos sexuais forzados, e 1 de cada 3 adolescentes de 15 a 19 anos (84 millóns) que algunha vez estivo casada foi vítima de actos de violencia emocional, física ou sexual cometido polo seu marido ou compañeiro.
• Os datos suxiren que, nalgúns países, polo menos 7 de cada 10 nenas de 15 a 19 anos que foron vítimas de abusos físicos e/ou sexuais nunca procuraron axuda: moitas dixeron que non crían que fose un caso de abuso ou non o consideraban un problema.
• En todo o mundo, máis de 700 millóns de mulleres vivas hoxe en día casaron antes de cumprir os 18 anos. Máis de 1 de cada 3 (ao redor de 250 millóns) iniciaron a unión antes de cumprir os 15 anos.

Os datos revelan percepcións prexudiciais sobre a aceptación da violencia, especialmente entre as nenas. En todo o mundo, preto da metade das nenas de 15 a 19 anos cre que está xustificado que un home golpee a súa muller ou compañeira baixo determinadas circunstancias, como por exemplo se rexeita ter relacións sexuais, se abandona a casa sen permiso, se discute, se descoida os nenos ou se queima a cea. "Estas cifras indican que existe unha mentalidade que tolera, perpetúa e mesmo xustifica a violencia, e deben servir de alarma para todos, en todas as partes", dixo a Directora Adxunta deUNICEF, Geeta Rao Gupta.UNICEF indicou que existen medidas específicas para evitar a violencia contra as nenas. Entre elas cabe destacar: manter as nenas na escola; proporcionarlles aptitudes fundamentais para a vida; apoiar os seus proxenitores, mesmo con transferencias de efectivo que mitiguen os riscos para as nenas; cambiando actitudes e normas por medio de conversacións comunitarias; e fortalecendo os sistemas e servizos xudiciais, penais e sociais. "O problema é mundial, pero as solucións débense buscar nos niveis nacionais, comunitarios e familiares. Temos a responsabilidade de protexer, educar e promover a autonomía das adolescentes. Todos somos responsables de poñer fin á violencia contra as nenas", dixoRao Gupta.