Día Mundial da Auga. As zonas rurais necesitan máis apoio para ter acceso a auga potable

30.000 nenos e adolescentes participan nas Carreiras da Auga en toda España. Pepe Reina e Pocoyó únense á campaña de sensibilización

Con motivo do Día Mundial da Auga, UNICEF pide aos gobernos prestar especial atención ás persoas que viven en zonas rurais xa que se están a quedar atrás no progreso dos seus países, especialmente no que respecta ao acceso a auga potable e servizos básicos de saneamento.

Hai dúas semanas un informe de UNICEF e a Organización Mundial da Saúde mostraba de xeito concluínte que nas zonas rurais, as persoas con menos recursos non teñen cubertas esas necesidades básicas."Os gobernos deben asegurarse de que os seus recursos logran resultados reais para as persoas máis pobres", dixoSanjay Wijesekera, Responsable de Auga, Saneamento e Hixiene de UNICEF."Pola contra corren o risco de deixar grandes porcións das súas poboacións, especialmente os nenos, cada vez máis vulnerables ás enfermidades. "O informe Progreso sobre a auga potable e saneamento 2012, reflicte que o mundo alcanzou unha das metas incluídas no Obxectivo de Desenvolvemento do Milenio relacionado co acceso a auga potable. A finais de 2010, o 89 por cento da poboación mundial, 6.100 millóns de persoas, utilizaban fontes melloradas de auga potable. Non obstante, asegura o informe, os habitantes de áreas rurais teñen máis probabilidades que os habitantes de zonas urbanas de non ter acceso a auga potable. Ademais, a nivel mundial existe unha disparidade case universal de acceso a auga potable nas zonas rurais en comparación coas urbanas. Dos 783 millóns de persoas aínda sen fontes melloradas de auga potable en 2010, 653 millóns son das zonas rurais. O panorama aínda é peor en relación ao saneamento, xa que o 79 por cento da poboación urbana mundial utiliza servizos de saneamento mellorados mentres que só o 47 por cento da poboación rural o ten. O 72 por cento dos que non teñen acceso a saneamento mellorado, 1.800 millóns de persoas, viven en zonas rurais.

 

UNICEF asegura que a desigualdade entre zonas rurais e urbanas en relación ao acceso a auga potable é particularmente importante nos países máis pobres. Na África subsahariana a brecha entre as zonas urbanas e rurais é de 34 puntos porcentuais. En media nos países menos desenvolvidos, 97 de cada 100 habitantes de zonas rurais non teñen instalacións de auga corrente. Ademais, na súa gran maioría, son as mulleres e as nenas que levan a peor parte, segundo UNICEF. As enquisas realizadas en 25 países de África subsahariana, revelan que no 71 por cento dos fogares sen auga, as mulleres ou as nenas son as principais responsables da recollida de auga. Cada familia adoita realizar polo menos unha viaxe ao día, e a miúdo máis, para transportar auga. Estímase que as mulleres dedican un total de polo menos 16 millóns de horas ao día a recoller auga potable, os homes dedican 6 millóns de horas, e os nenos, 4 millóns de horas."A auga potable debe chegar a todos", dixo Wijesekera. "Non podemos celebrar o progreso ata que aquelas persoas ás que máis custa chegar poidan abrir unha billa, ou ir a un pozo ou á bomba e obter suficiente auga potable para as súas necesidades diarias. "  

 

En España, os nenos participan nas Carreiras da Auga

 

UNICEF España organiza por cuarto ano consecutivo as Carreiras da Auga, no marco da campaña de mobilización escolar Gotaspara Níxer. Esta semana realizaranse carreiras solidarias en todo o país, nas que xa se inscribiron máis de 30.000 participantes.

Pepe Reina, porteiro da selección española de fútbol e do LiverpoolF.C., quixo participar nesta iniciativa motivando aos máis pequenos e poñendo el tamén a súa gota. "Non é xusto que nenos e nenas non vaian á escola porque deben percorrer longos e perigosos camiños para levar auga á casa. Todo o mundo debería ter acceso á auga potable. A infancia de Níxer merece un presente e un futuro", dixo. Anímanos a todos a facer un pequeno esforzo: "Necesitamos que cada un achegue a súa gota".Pocoyó tamén está a colaborar con esta campaña, protagonizando dous anuncios nos que se anima os nenos a aforrar auga e compartila. Estas pezas, que se enmarcan dentro da colaboración que Zinkia Entertainmente UNICEF España desenvolven para promover o coñecemento dos dereitos da infancia entre o público infantil, estanse a emitir na canle Clan de TVE e na súa páxina web.

Para descargar materiais en vídeo:

https://unicefweb.unicef.es/com/agua

Usuario:  Refcom

Contrasinal: uce442087