A pobreza infantil en España, entre as máis altas dos países industrializados

UNICEF España pon en marcha unha recollida de firmas para reclamar que se cumpran os compromisos adquiridos na loita contra a pobreza infantil no noso país

As taxas de pobreza infantil en España son das máis altas dos países industrializados, só superadas por Letonia, Estados Unidos e Romanía, segundo un estudo sobre benestar infantil realizado en 29 países pola Oficina de Investigación de UNICEF con datos da primeira década do século XXI.

O informe Report Card n.º11 mide a situación da infancia nas 29 economías máis avanzadas do mundo de acordo con cinco dimensións clave da vida dos nenos: benestar material, saúde e seguridade, educación, condutas e riscos, e vivenda e medio. A principal conclusión do estudo é que a pobreza infantil nestes países non é inevitable, senón que é sensible ás políticas e que determinados países protexen mellor que outros aos nenos máis vulnerables. O Países Baixos e catro países nórdicos -Finlandia, Islandia, Noruega e Suecia- copan os primeiros postos da clasificación xeral do benestar infantil, mentres que catro países do sur de Europa -España, Grecia, Italia e Portugal- se encontran na metade inferior da táboa. Nesta análise comparativa, España encóntrase ademais á cola no ámbito educativo, ocupando o posto 26 de 29 países analizados. "Tanto actualmente, coa crise, como en épocas mellores dende o punto de vista económico, UNICEFsempre insta aos gobernos e aos interlocutores sociais a colocar os nenos e os mozos no centro dos seus procesos de toma de decisións", dixo Gordon Alexander, director da Oficina de Investigación de UNICEF. "Cada vez que estudan ou aproban unha nova medida política, os gobernos deben analizar as súas consecuencias concretas para os nenos, as familias con fillos, os adolescentes e os mozos adultos. Estes grupos non participan no proceso político ou as súas voces rara vez son escoitadas. "

Segundo o estudo, non existe unha relación directa entre o PIB per cápita e o benestar xeral dos nenos. Por exemplo, Eslovenia está mellor clasificada que Canadá; a República Checa, mellor que Austria; e Portugal, mellor que os Estados Unidos. Os nenos con peores niveis de benestar sofren as consecuencias o resto das súas vidas. Intentar atallar ou mitigar o impacto das secuelas no futuro é máis difícil, máis custoso e ten menos probabilidades de ter éxito. De aí que as intervencións na primeira infancia sexan cruciais e deban ser apoiadas por medidas na etapa escolar para non perder os avances feitos ao principio. O informe inclúe unha comparativa de datos entre 2000 e 2010 que mostra unha continua mellora xeral na maioría dos indicadores de benestar infantil. Moitas destas tendencias positivas son o resultado de apostas e investimentos a longo prazo na vida dos nenos asumidos por moitos Estados. Por este motivo é crucial facer un seguimento moi próximo da evolución do estado actual dos nenos nos países industrializados, para previr os peores efectos da recesión económica e evitar a perda dos progresos alcanzados na pasada década.

O Report Card n.º11 inclúe ademais as opinións dos nenos respecto ao seu grao de satisfacción coa súa propia vida. As súas conclusións reflíctense na táboa clasificatoria de satisfacción vital e coinciden, en liñas xerais, coas medicións do benestar a partir de datos, aínda que hai excepcións notables: os nenos de España, Estonia e Grecia outorgaron aos seus países unha clasificación moito máis alta, mentres que os de Alemaña, Luxemburgo e Polonia puntuaron peor os seus. Non sabemos o suficiente sobre o modo en que os nenos perciben e avalían as súas vidas, debemos descubrir que é importante para eles, e facelo dun modo máis sistemático", declarou Gordon Alexander. "A voz dos nenos, mesmo a dos máis pequenos, é fundamental. Reitera a mensaxe deste e outros informes sobre o benestar da infancia: os gobernos deben orientar as súas políticas para protexer o futuro a longo prazo dos seus nenos e economías. Hoxe, máis que nunca, se trata dunha cuestión urxente".

Recollida de firmas para loitar contra a pobreza infantil

 En 2010 España comprometeuse ante a Unión Europea a reducir en 250.000 o número de nenos en situación de pobreza ata 2020, pero o número de nenos e nenas pobres segue aumentando. En 2012 o noso país asumiu que a pobreza infantil sería unha prioridade nos plans de acción que están a elaborar pola inclusión social e o apoio ás familias. Por esa razón, UNICEF España lanza hoxe unha acción de recollida de firmas en www.unicef.es á que se pode sumar calquera persoa para instar os responsables políticos e as administracións públicas que cumpran estes compromisos coa infancia en España: garantindo os recursos suficientes para os fogares con nenos, proporcionando servizos de calidade e involucrando os propios nenos e as súas familias no deseño das medidas.

 Para descargar o informe completo: http://www.unicef.es/sites/www.unicef.es/files/Bienestarinfantil_UNICEF.pdf