Desastres naturais: máis da metade dos afectados son nenos
No Día Internacional para a Redución dos Desastres Naturais, dende UNICEF recordamos que é posible evitar a morte de miles de nenos mediante a preparación, prevención e mitigación ante os riscos naturais.
Os nenos representan entre o 50% e o 60% da poboación afectada por desastres naturais no mundo.
Este tipo de emerxencias aumenta exponencialmente os niveis de mortalidade infantil, non só polas vítimas directas que poida producir a catástrofe, senón sobre todo porque aumentan riscos como a desnutrición ou os problemas nos sistemas de auga e saneamento, que se ve acentuados nestas situacións.
Ademais, as catástrofes naturais interrompen o desenvolvemento educativo dos nenos e poden causarlles graves traumas psicolóxicos. Así mesmo, moitos son separados das súas familias e quedan expostos á explotación e o abuso.
175 millóns de nenos afectados cada ano por desastres naturais
O número de desastres naturais triplicouse dende a década dos 70, impulsados polo cambio climático. Estímase que o número de nenos afectados aumentará nos próximos anos ata chegar aos 175 millóns anuais nesta década.
Por este motivo, e coincidindo co Día Internacional para a Redución dos Desastres Naturais que se celebra hoxe, dende UNICEF recordamos que, a través dun traballo de preparación técnica e material, é posible mitigar o impacto destes fenómenos na taxa de mortalidade infantil dos países afectados.
O alcance e a gravidade das consecuencias dos desastres naturais están directamente relacionados coa capacidade das infraestruturas, recursos técnicos e materiais de cada país. Por iso, o impacto dunha catástrofe multiplícase nos países en desenvolvemento, onde se concentran o 90% das mortes provocadas por este tipo de fenómenos e onde o alcance da destrución provoca os danos máis graves.
O 90% das mortes por desastres naturais danse en países en desenvolvemento
Os nosos proxectos buscan fortalecer a resiliencia, a capacidade para sobrepoñerse que teñen as sociedades que sofren frecuentemente catástrofes naturais, destacando a prioridade de protexer mulleres e nenos. Para que a acción humanitaria neste tipo de situacións sexa efectiva, é preciso non só cubrir as necesidades inmediatas das persoas, senón tamén o fortalecemento das súas habilidades para enfrontarse a futuros desastres.
Un exemplo do traballo útil para a redución de riscos é o intenso labor que realizamos actualmente para frear o avance do ébola en África. As campañas de sensibilización nos países afectados están a conseguir que a poboación poida detectar síntomas da enfermidade, ou as medidas para evitar o contaxio. Pero no caso doutros brotes no futuro, os cidadáns xa terán de antemán unha información que ata agora non tiñan e que reduce o risco de propagación.
A crise do ébola tamén explica a importancia de ter un sistema de saúde forte ante este tipo de epidemias. Dous países de África Occidental, Nixeria e Senegal, conseguiron frear de forma efectiva a expansión da enfermidade, o que se explica en gran parte porque teñen sistemas de saúde máis preparados. Non obstante, os países que están a sufrir unha maior propagación do virus, como Serra Leoa, Guinea ou Liberia, tiñan un sistema de saúde moito máis débil que non puido facer fronte a esta situación.
O aumento dos niveis de desnutrición é un dos grandes retos tras un desastre natural. Dende UNICEF apoiamos de forma constante os países con taxas de desnutrición infantil para estender e fortalecer o acceso a unha nutrición de calidade. Apoiamos intervencións que se sustentan nas capacidades locais e protexemos as prácticas positivas de nutrición xa existentes sempre que é posible, co obxectivo de facilitar que as comunidades poidan facer fronte posteriores crises. En países como Mauritania, UNICEF realiza enquisas de nutrición periodicamente co fin de preparar un programa de seguridade alimentaria e establecer un sistema de alerta temperá ante posibles crises de desnutrición.
Agora non podemos parar de salvar vidas
Para seguir avanzando na loita pola supervivencia infantil en todo momento e en todas as situacións, dende UNICEF lanzamos a campaña Agora non podemos parar. Con ela queremos explicar os avances realizados e os grandes retos pendentes para seguir salvando vidas.
Os índices de supervivencia infantil melloraron radicalmente: en 1990, 12,7 millóns de nenos menores de cinco anos morreron por causas que podemos evitar; en 2013 esta cifra foi de 6,3 millóns. É unha redución de case a metade, pero a pesar dos avances, máis de 17.000 nenos menores de cinco anos morren cada día por causas que se poden evitar con medidas tan sinxelas como ter vacinas, auga ou unha nutrición axeitada.
Que puedes facer ti para frear a mortalidade infantil?
Para contribuír ao traballo de UNICEF contra a mortalidade infantil podes:
- Facer unha doazón online
- Enviar un SMS coa palabra UNICEF ao 28028 *: 1,20 euros íntegros para UNICEF. Con esta cantidade pódese vacinar un neno contra varias enfermidades mortais, ou custear o tratamento contra a desnutrición para un neno durante un día.
- Facer un donativo por teléfono no 902 31 41 31
- Sumarte á nosa comunidade de optimistas e convencer aos teus os teus amigos e coñecidos de que estamos máis preto que nunca de rematar coa mortalidade infantil. Podes descargarche o noso kit de superviviencia e axudarnos a difundir a mensaxe nas túas redes sociais.
*IMPORTE DO SERVICIO DE SMS 1,20€ ÍNTEGRO PARA UNICEF. Válido para Movistar, Vodafone, Orange, Yoigo e Euskaltel. Número sen fins comerciais. Operado por UNICEF. N.atn.clte: 902228028, sms@unicef.es. Información legal e protección de datos: www.unicef.es