Bakearen etxea

• Eguneroko bake-inguruneak identifikatzen lagunduko digun Haur Hezkuntzako ikasleei zuzendutako jolasa.

• Zein elementurekin eraiki dezakegu bake eta lasaitasun giroa?

Jolas honetan, haur baten bizitzako eguneroko espazioak ikusten ditugu: sukaldea, logela, komuna eta etxeko egongela. Espazio horiei lotuta daude gure ongizaterako eguneroko ohiturak: elikadura, loa, higienea, erlaxazioa eta familiarteko denbora. Hala ere, etxe batek bete behar dituen oinarrizko zaintza-beharrizan eta -errutinak betetzen ez direnean, tentsioak, frustrazioa eta ondoeza izateko arriskua dago.

Gainera, ongizate hori lortzeko, beharrezkoa da bake eta indarkeriarik gabeko giroa sortzea; eta hori lor dezakegu, neurri batean, inguratzen gaituzten elementuak eta objektuak (altzariak, jostailuak, ikus-entzunezko estimuluak, eta abar) behar bezala aukeratzen baditugu.

Ikasleekin aztertu behar da ea zer elementuk balio duten eta zer elementuk ez duten balio bakea eta lasaitasun giroa eraikitzeko.

Zerikusia duten haurren eskubideak:

• Atsedenerako eta jolaserako eskubidea.
• Familiarako eskubidea.
• Elikatzeko eskubidea.
• Ura, saneamendua eta higienea izateko eskubidea.

Nola jolasten da?

Jolasaren funtsa da bakea nagusi izango duen etxe bat eraikitzea, espazio bakoitza etxe hori eraikitzen lagunduko duen eskubide jakin bati lotuz. Adibidez, sukaldea elikatzeko eskubideari lotuta egongo da. Egongela, familia eta jolaserako eskubideari. Logela, atsedenerako eskubideari. Eta komuna, berriz, ura, saneamendua eta higienea izateko eskubideari. Eskubide horiek guztiak sustatuz gero, bake eta harmonia giroa lortuko dugu.

"Bakearen etxe" hori lortzeko, gela bakoitza espazio bakoitzari lotutako eskubidea lortzen lagunduko duten objektuekin eta elementuekin hornitu behar dugu. Adibidez, janari nutritibo batek elikatzeko eskubidea sustatzen lagunduko digu; baina ideia horren aurkako elementuak baztertu behar dira, nahi dugun eskubidea lortzea eta bake ingurune bat eraikitzea eragozten diguten elementuak (adibidez, gerra jostailuak edo oihuak).

Jolas hau irudiak arrastatzean dago oinarrituta, eta espazio egokira eraman behar dira. Adibidez: fruta, sukaldera. Betiere, baloratu behar da ea elementu horrek bakea eraikitzeko aukera ematen digun ala ez. Honelako galderak egin ditzakegu: "Frutak ondo sentiarazten digu?", "Hobeto egoteko balio digu?".

Ikastaldearen eta eskura dauden baliabideen arabera, irakasleak objektuak arrastatzeko lana egin dezake; edo lan hori parte hartzen duten ikasleek txandaka egin dezakete

Jolasten dugun bitartean

Arraste jolasa egiteaz eta bakea eta indarkeria eza sustatzeko ingurune ezin hobea eraikitzeaz gain, proposatzen da eztabaida txiki bat irekitzea ikasleekin, jolasean agertzen den elementu bakoitzari buruz hitz egiteko:

• Zergatik dira batzuk egokiak giro baketsua eraikitzeko, eta beste batzuk ez?
• Zer pentsatzen du parte-hartzaile bakoitzak?

Adibidez, nutrizio ona lortzeak (nutriziorako eskubidea) hobeto sentitzea ahalbidetzen du, osasuntsuago, lasaiago eta zoriontsuago egotea. Beraz, ikuspuntu horretatik, errazagoa da bakea eta indarkeriarik eza dituen giroa lortzea.

Jolas hori familiekin batera garatzen bada, garrantzitsua da gogoeta egitea haurren oinarrizko eskubideak betetzeak bake-ingurune bat sortzeko duen garrantziaz. Haurren eskubideak ez betetzea, berez, indarkeria-ekintza bat da.

Hitz gakoak:

Bizikidetza, bakea, indarkeriarik eza, bakezaletasuna, haurren eskubideak, oinarrizko premiak, ohiturak eta errutinak, etxea, familia.

Nori zuzendua: Haur Hezkuntzako ikasleak, familiak.

Editaia: UNICEF Espainia, 2023ko abendua

Edukiak eta ekoizpena: Eduxarxa, SCCL

Beste hizkuntzatan eskuragai: CAT | EUS | GAL | VAL

Genially-n ere eskuragai: CAT | EUS | GAL | VAL