Axuda a María a saír da casa do terror

• Para saír da casa do terror, María só necesita atopar algúns obxectos clave que lle fagan recordar quen é e que dereitos ten. Axúdala?

• Xogo tipo escape room para formación de educadores.

Este xogo é un escape room no que o obxectivo é afastar á súa protagonista, María, dun espazo ou situación que se caracteriza pola escuridade, facéndolle recuperar a atención cara a súa persoa e os seus dereitos básicos, simbolizados mediante obxectos que nos permiten conectar con amplitude de ideas. 

O percorrido polo escape room inclúe a superación de certas probas que  permiten recuperar eses obxectos que teñen unha función catártica. O xogo é unha maneira de iniciar un debate sobre a necesidade de reivindicarnos e reivindicar os nosos dereitos para vivir en paz e con tranquilidade. 

Orientación sobre etapa educativa 

Propomos este xogo para os distintos cursos dos graos formativos de servizos culturais e á comunidade, aínda que, se se desexa, pódese realizar noutras etapas educativas.

Dereitos da infancia relacionados

• Dereito á protección fronte á violencia
• Dereito á participación e á liberdade de expresión
• Dereito á familia
• Dereito á educación
• Dereito a unha identidade

Como se xoga? 

Durante ou despois do xogo:

Suxírese iniciar un debate arredor das cuestións que aparecen en cada pantalla, que poden lerse como metáforas da vida real, dando lugar a moitas interpretacións.

Este debate pódese realizar ao formular cada pregunta, valorando cada unha das solucións ofrecidas e pensando que pode significar o que se presenta ou que conexión pode ter cos problemas cotiáns do alumnado. O debate-charla tamén se pode realizar ao final do xogo, facendo un repaso máis xeral das ideas apuntadas durante as preguntas aparecidas nas distintas pantallas.

En calquera caso, estas preguntas poden axudar a animar o debate:   

• A partir dos obxectos que busca e a súa simboloxía, imaxinade a razón pola cal María está encerrada nunha casa do terror. Cal podería ser? (Por exemplo: busca de identidade, de obxectivos vitais, vida en paz e harmonía...).

• Que podería ser para vós unha casa do terror?

• Que credes que pode simbolizar cada un dos obxectos que María busca e atopa? Chave, caderno con notas de música, lupa, maletín con fotografías (por exemplo: chave = busca a clave para resolver algún conflito; música e lupa = precisa prestar atención aos detalles da vida, crear a súa propia banda sonora...; maletín con fotografías = tenta definir a súa propia imaxe).

Podemos basearnos nas cuestións que se formulan nas distintas preguntas para crear certos paralelismos coa vida real e utilizalas como metáfora para falar de temas máis profundos. Por exemplo:

• As chaves que pechan e abren portas, a busca da chave correcta, o peso dun cadeado pechado para sempre; 
• A banda sonora dunha vida (a música e sons que hai en cada escena, pero tamén a que creamos expresamente para cada ocasión)
• O sentido da busca e de fixarse nos detalles máis pequenos como se fai nalgunhas profesións mediante un obxecto como a lupa, que permite prestar atención ás cousas aparentemente máis insignificantes pero que, porén, poden revolucionar a ciencia; 
• As lembranzas, a conexión co noso pasado, os nosos devanceiros, a nosa propia imaxe (a que proxectamos e a que é), a dos demais... E os medios que usamos para facelo (antes e agora), como, por exemplo, as fotografías.
• Que poderían significar todos estes obxectos e símbolos na nosa propia biografía?
• Como contribúe todo o que vimos a crear ou romper un clima de paz con nós mesmos e co que nos rodea?

Conceptos clave:

Educación socio afectiva, emocións na aula, paz mental, solución de conflitos, paz, non violencia.

Dirixido a: estudantes de ciclos formativos de servizos socioculturais e á comunidade ou de educación.

Edita: UNICEF España, decembro de 2023

Conceptualización e produción: Eduxarxa, SCCL

Tamén dispoñible en:  CAS 

Dispoñible en Genially en:  CAS |   CAT |  EUS |  GAL |  VAL |  ENG