Sopa de letras

• Descobre nesta sopa de letras palabras relacionadas cos conflitos e palabras relacionadas coa súa solución. 

• Xogo para a aula de Educación Primaria.

Para aprender a detectar os conflitos, a aceptalos e xestionalos de forma non violenta, é moi importante ser capaces de identificalos e describilos, nisto, as palabras xogan un papel fundamental. Adquirir o vocabulario necesario para falar dos conflitos e da súa prevención e resolución é clave para xerar un clima de paz ao que todos os nenos e nenas teñen dereito. Baseándonos nesta premisa, presentamos dúas sopas de letras:  

• Na primeira, atopamos palabras que fan referencia a cousas ou situacións que poden romper o clima de paz nun aula.
• Na segunda, en cambio, atoparemos outras palabras que nos permitirán "desactivar" as situacións anteriores.

Así, poderemos formar parellas de palabras que servirán para introducir un pequeno debate sobre a detección, a aceptación e a resolución de conflitos dun xeito non violento como traballo constante para acadar un ambiente pacífico no que vivir. 

Orientación sobre a etapa educativa

Este xogo está recomendado para alumnado do ciclo inicial de Primaria (CI). Ademais, pode ser útil como actividade de reforzo para practicar a lectoescritura. 

Dereitos da infancia relacionados:

• Dereito á protección fronte á violencia.
• Dereito á participación e á liberdade de expresión.

Como se xoga?

A dinámica deste xogo baséase no funcionamento das sopas de letras tradicionais:

• Hai dúas sopas de letras. Na primeira, búscanse palabras que suxiren un conflito: problema, violencia, berrar, pelexar, enfadarse. Na segunda, palabras que axudan a resolver ese conflito: solución, paz, escoitar, respectar, falar. 
• Ao lado da sopa de letras, inclúense as palabras que se teñen que atopar.
• Recoméndase proxectar no taboleiro dixital o recurso e propoñer ao grupo realizar as dúas sopas de letras entre todos, sen competitividade, presentándoo como un xogo cooperativo. 

Despois de xogar

Unha vez rematadas as sopas de letras, preguntaráselle ao alumnado que parellas formarían, e por que. As parellas iniciais que se propoñen son as seguintes, aínda que, ben argumentadas, poden aparecer outras:

• problema-solución,
• violencia-paz,
• berrar-escoitar,
• pelexar-respectar,
• discutir-falar. 

Dependendo da implicación do alumnado, pódese preguntar se se lles ocorren outras palabras para a segunda sopa de letras e para formar parte das parellas. 

Conceptos clave:

Convivencia, paz, non violencia, resolución de conflitos, educación para a paz.

Dirixido a: Educación Primaria

Edita: UNICEF España, decembro de 2023

Conceptualización e produción: Eduxarxa, SCCL

Tamén dispoñible en:  CAS |

Dispoñible en Genially en:  CAS |   CAT |  EUS |  GAL |  VAL |  ENG